सिरहा । प्रादेशिक अस्पताल सिरहामा आर्थिक वर्ष २०८०/०८१ मा बिलिङ काउन्टरबाट संकलन भएको सेवा शुल्क सरकारी खातामा दाखिला नगरी हानि–नोक्सानी तथा दुरुपयोग गरिएको आरोपमा तत्कालीन कार्यालय प्रमुखसहित १० जनाविरुद्ध भ्रष्टाचार मुद्दा दायर गरिएको छ।
अख्तियार दुरुपयोग अनुसन्धान आयोगले अस्पतालको बिलिङ काउन्टरबाट उठेको सेवा शुल्क नियमानुसार राजस्व खातामा दाखिला नगरिएको निष्कर्ष निकाल्दै विशेष अदालतमा मुद्दा दायर गरेको हो। आयोगका अनुसार संकलित रकम सरकारी खातामा नपुर्याई दुरुपयोग गरिएको पाइएको छ।
मुद्दाका प्रतिवादीमा प्रादेशिक अस्पताल सिरहाका तत्कालीन कार्यालय प्रमुखहरू डा. नागेन्द्र प्रसाद यादव र डा. सरोज यादवसहित अन्य १० जना रहेका छन्। उनीहरूमाथि भ्रष्टाचार निवारण ऐन, २०५९ को दफा १७ बमोजिमको कसुर लगाइएको छ।
अख्तियारले यस प्रकरणमा रु. ३८ लाख ७७ हजार ७२४ रुपैयाँ ८३ पैसा बिगो कायम गरी प्रतिवादीहरूलाई सोही बमोजिम कैद सजाय, बिगो बराबर जरिवाना तथा बिगो असुल उपरको मागदाबी लिएको छ।
यस घटनाले सरकारी स्वास्थ्य संस्थामा आर्थिक अनुशासन र पारदर्शितामाथि गम्भीर प्रश्न उठाएको छ। अब यस प्रकरणमा विशेष अदालतको फैसलाले दोषी ठहर हुन्छ वा हुँदैन भन्ने अन्तिम टुंगो लगाउनेछ।
