फाल्गुण ४ देखि १० सम्म सुखिपुर नगरपालिकामा विद्यालय केन्द्रित HPV खोप अभियान सञ्चालन हुने ।

सिरहा । पाठेघरको मुखको क्यान्सर विरुद्ध प्रभावकारी मानिने HPV (ह्युमन प्यापिलोमा भाइरस) खोप अभियान यहि फाल्गुण ४ गतेदेखि १० गतेसम्म सुखिपुर नगरपालिका भित्र विद्यालय केन्द्रित रूपमा सञ्चालन हुने भएको छ।
सुखिपुर नगरपालिकाको स्वास्थ्य शाखाका अनुसार अभियान अन्तर्गत कक्षा ६ मा अध्ययनरत छात्रा, विद्यालय नजाने १० वर्ष उमेर पुगेका किशोरीहरू, साथै गत वर्षको HPV खोप अभियानमा खोप लिन छुट भएका कक्षा ७, ८, ९ र १० का छात्रा तथा विद्यालय नजाने समुदायमा रहेका ११ वर्षदेखि १४ वर्ष उमेर समूहका किशोरीहरूलाई HPV खोप प्रदान गरिने छ।
पाठेघरको मुखको क्यान्सर महिलाहरूमा देखिने गम्भीर स्वास्थ्य समस्यामध्ये एक भएकाले यसबाट बच्न HPV खोप अत्यन्त प्रभावकारी र आवश्यक रहेको स्वास्थ्यकर्मीहरूले बताएका छन्। अभियानअन्तर्गत लक्षित उमेर समूहका किशोरीहरूलाई निःशुल्क खोप लगाइने जानकारी दिइएको छ।सुखिपुर नगरपालिकाले लक्षित समूहका सबै किशोरीहरू तथा अभिभावकहरूलाई तोकिएको मितिभित्र नजिकको विद्यालय वा तोकिएका खोप केन्द्रमा उपस्थित भई अनिवार्य रूपमा HPV खोप लगाउन आग्रह गरेको छ। खोपले भविष्यमा पाठेघरको मुखको क्यान्सरबाट जोगिन महत्वपूर्ण योगदान पुर्‍याउने विश्वास लिइएको छ।