सुखीपुर (सिरहा) / सिरहा क्षेत्र नं. २ मा प्रतिनिधि सभा निर्वाचन नजिकिँदै जाँदा चुनावी सरगर्मी तीव्र बन्दै गएको छ। यही क्रममा विभिन्न राजनीतिक दलका स्थानीय नेता तथा कार्यकर्ताहरू राष्ट्रिय स्वतन्त्र पार्टी (रास्वपा) तर्फ आकर्षित हुने क्रम बढ्दो देखिएको छ।सुखीपुर नगरपालिका–५ का कांग्रेस, जसपा, जनमत पार्टी र नेकपा एमालेका नेताहरूले एकैसाथ रास्वपामा प्रवेश गरेका छन्। रास्वपामा प्रवेश गर्नेहरूमा जसपाका पूर्व निर्वाचित वडाध्यक्ष शैलेन्द्र कामती, नेपाली कांग्रेसका क्रियाशील सदस्य ओमप्रकाश यादव, जनमत पार्टीका वडा अध्यक्ष पृथ्वी मण्डल, नेकपा एमालेका वडा सचिव रामरिझन यादव तथा जसपाका वडा सदस्य अजय कुमार यादव रहेका छन्।
पार्टी प्रवेश कार्यक्रममा उनीहरूले आगामी प्रतिनिधि सभा निर्वाचनमा घण्टी चिन्हमा मतदान गर्दै रास्वपा उम्मेदवार शिव यादवलाई विजयी बनाउन सक्रिय भूमिका खेल्ने प्रतिवद्धता जनाएका छन्।विभिन्न दलमा लामो समयदेखि जिम्मेवारी सम्हाल्दै आएका स्थानीय नेताहरूको एकैसाथ रास्वपामा प्रवेशले सुखीपुर क्षेत्रसहित समग्र सिरहा क्षेत्र नं. २ को चुनावी प्रतिस्पर्धामा नयाँ गतिशीलता थपिएको राजनीतिक विश्लेषकहरूको भनाइ छ। साथै, यस घटनाक्रमलाई स्थानीय मतदाताले पनि चासोका साथ हेरिरहेको देखिन्छ।
