काठमाडौं । बंगलादेशको मेमनसिंह जिल्लामा २७ वर्षीय हिन्दू युवा तथा गार्मेन्ट्स मजदुर दीपु चन्द्र दासको भीडहिंसाद्वारा निर्मम हत्या भएको घटनाप्रति जन अधिकार पार्टीले कडा निन्दा गरेको छ। पार्टीले यस घटनालाई मानवताविरुद्धको जघन्य अपराधको संज्ञा दिँदै दोषीहरूलाई कडा कारबाही गर्न माग गरेको छ।
प्राप्त विवरणअनुसार इसनिन्दासम्बन्धी आधारहीन आरोप लगाउँदै भीडले दीपु चन्द्र दासलाई कुटपिट गरी हत्या गरेको र पछि शवलाई रुखमा बाँधेर आगो लगाइएको बताइएको छ। जन अधिकार पार्टीले कुनै पनि बहानामा कानुन हातमा लिनु र अल्पसंख्यक समुदायका नागरिकको जीवन लिनु अस्वीकार्य भएको स्पष्ट पारेको छ।
पार्टीले बंगलादेश सरकारसँग अल्पसंख्यक समुदायमाथि हुने जघन्य अपराधमा संलग्न सबैमाथि निष्पक्ष छानबिन गरी कडा कारबाही गर्न, अल्पसंख्यकको बाँच्ने अधिकार सुनिश्चित गर्न तथा पीडित परिवारको सुरक्षा र क्षतिपूर्तिको व्यवस्था गर्न माग गरेको छ।
प्रेस विज्ञप्तिमा राज्य, राजनीतिक दल, नागरिक समाज र आमनागरिक सबैले मानव अधिकार संरक्षणमा साझा जिम्मेवारी वहन गर्नुपर्ने उल्लेख गरिएको छ। जन अधिकार पार्टीले सकारात्मक राजनीति, मानवीय संवेदना र जिम्मेवार नेतृत्वमार्फत शान्तिपूर्ण समाज निर्माणप्रति आफूहरू प्रतिबद्ध रहेको जनाएको छ।
पार्टीका राष्ट्रिय अध्यक्ष डा. शरद सिंह यादवद्वारा जारी विज्ञप्तिमा अहिंसा, न्याय र मानव अधिकारप्रति सदैव सजग रहने र पीडित पक्षले छिटो न्याय पाउने विश्वास व्यक्त गरिएको छ।
