काठमाडौं । मधेशी एकता समाजको आयोजनामा “परिवर्तनशील समयमा मधेश ” (Madhesh in Evolving Time)” शीर्षकमा विचार–मन्थन कार्यक्रम आयोजना हुने भएको छ। समाजले समसामयिक राजनीतिक, सामाजिक र सांस्कृतिक परिवर्तनको सन्दर्भमा मधेशको अवस्था, चुनौती र सम्भावनाबारे गहन छलफल गर्ने उद्देश्यले कार्यक्रम गर्न लागेको जनाएको छ।
कार्यक्रम २०८२ पुस ५ गते (डिसेम्बर २०, २०२५) मंगलबार दिउँसो १२ बजे काठमाडौंको अनामनगरस्थित तमु बौद्ध सेवा समितिको सभाहलमा सम्पन्न हुनेछ। कार्यक्रममा विभिन्न क्षेत्रका प्रतिष्ठित व्यक्तित्वहरूको सहभागिता रहनेछ। अतिथि वक्ताका रूपमा स्तम्भकार तथा लेखक सी.के. लाल, जनमत पार्टीका अध्यक्ष डा. सी.के. राउत, सामाजिक अभियन्ता राकेश मिश्र, विश्लेषक तुला नारायण साह, राजनीतिज्ञ यामी भट्टराईलगायतको उपस्थिति रहने आयोजकले जानकारी दिएको छ।
त्यसैगरी युवा पुस्ताको प्रतिनिधित्व गर्दै आवास गुरु, मजिद अन्सारी, राजेश बिद्रोही, शिव यादवलगायत वक्ताहरूले आफ्ना धारणा राख्नेछन्। कार्यक्रमको सहजीकरण आनन्द गुप्ताले गर्नेछन् भने मधेशी एकता समाजका संस्थापक तथा संयोजक डा. रवीन्द्र के. यादव र डा. बबी सिंह पनि कार्यक्रममा सहभागी हुनेछन्।
मधेशी एकता समाजले मधेशका मुद्दा, पहिचान, समावेशिता र राष्ट्रिय राजनीतिमा मधेशको भूमिकाबारे बहसलाई सशक्त बनाउने लक्ष्यसहित कार्यक्रम आयोजना गरिएको जनाएको छ। कार्यक्रममा सबै सरोकारवाला, बुद्धिजीवी, युवा तथा सर्वसाधारणलाई उपस्थित भई छलफलमा सहभागी हुन हार्दिक आमन्त्रण गरिएको छ।
