अस्ट्रेलिया ।
अस्ट्रेलियाको सिड्नीस्थित चर्चित बोन्डी बीचमा यहूदी समुदायको पर्व हनुक्का मनाइरहेका सहभागीहरूमाथि भएको आक्रमणमा कम्तीमा १६ जनाको ज्यान गएको पुष्टि भएको छ भने ४० भन्दा बढी घाइते भएका छन्। अधिकारीहरूका अनुसार उक्त घटना गम्भीर आतङ्ककारी गोलीकाण्डका रूपमा लिइएको छ।
देश तथा विदेशका सञ्चारमाध्यमका अनुसार आक्रमणमा बाउ–छोराको संलग्नता रहेको बताइएको छ। प्रारम्भिक प्रहरी अनुसन्धानअनुसार ५० वर्षीय साजिद अकरम र उनका २४ वर्षीय छोरा नवीद अकरमले कार्यक्रम भइरहेकै बेला भीडमाथि अन्धाधुन्ध गोली चलाएका थिए। घटनास्थलमै प्रहरीले साजिद अकरमलाई मारिदिएको छ भने उनका छोरा नवीद घाइते अवस्थामा अस्पतालमा उपचाररत छन्।
केही स्थानीय सञ्चारमाध्यमहरूले नवीद अकरमको पाकिस्तानी कनेक्सन रहेको दाबी गरे पनि यसबारे आधिकारिक स्रोतबाट पुष्टि भइनसकेको जनाइएको छ। प्रहरीले घटनासँग सम्बन्धित सबै पक्षको गहिरो अनुसन्धान भइरहेको बताएको छ।
घटनास्थलबाट सार्वजनिक भएका तस्बिर र भिडियोहरूमा हजारौँ मानिसहरू पर्व मनाइरहेका बेला अचानक गोली चलेपछि अफरातफरी मच्चिएको दृश्य देखिन्छ। सामाजिक सञ्जालमा भाइरल भएका केही भिडियोहरूमा सर्वसाधारणले शूटरलाई नियन्त्रणमा लिन प्रयास गरेको देखिएको छ। सोही क्रममा अहमद अल अहमदले आक्रमणकारीको हातबाट बन्दुक खोसेर साहसिक कार्य प्रदर्शन गरेका थिए, जसको सर्वत्र प्रशंसा भइरहेको छ।
अस्ट्रेलियाका प्रधानमन्त्री एन्थोनी अल्बानीजले उक्त घटनालाई ‘भयानक आतङ्कवादी आक्रमण’ को संज्ञा दिँदै कडा निन्दा गरेका छन्। उनले देशभर एकता कायम राख्न आग्रह गर्दै पीडित परिवारप्रति गहिरो समवेदना व्यक्त गरेका छन्। विभिन्न राजनीतिक नेताहरूले पनि नस्लवाद र घृणाविरुद्ध कडा कदम चाल्ने प्रतिबद्धता जनाएका छन्।
सुरक्षा निकायहरूले सम्भावित सहआरोपी, शंकास्पद सामग्री तथा घटनासँग जोडिएका अन्य कोणहरूबारे अनुसन्धान तीव्र पारेका छन्। यस घटनाले अस्ट्रेलियामा बन्दुक नियन्त्रण र सामाजिक सद्भाव सुदृढ गर्नुपर्ने बहसलाई पुनः चर्काएको छ। साभार- न्युजब्युरोडटकमबाट ।
