मधेश प्रदेशमा आत्महत्याका घटनाहरू वर्षेनी बढ्दै गएको तथ्याङ्क सार्वजनिक भएको छ। पछिल्लो चार वर्षमा मात्रै प्रदेशभर चार हजार पाँच सय ८९ जनाले आत्महत्याबाट ज्यान गुमाएका छन्। तीमध्ये पछिल्लो एक वर्षमै एक हजार दुई सय २२ जनाले आत्महत्या गरेको तथ्याङ्कले देखाएको छ, जसमा महिलाको संख्या तुलनात्मक रूपमा बढी रहेको पाइएको छ।
राष्ट्रिय मानव अधिकार आयोगको मधेश प्रदेश कार्यालय, जनकपुरका प्रमुख बुद्धनारायण सहनीले राजविराजमा आयोजित कार्यक्रममा प्रस्तुत गर्नुभएको विवरणअनुसार आर्थिक वर्ष २०७८/०७९ मा एक हजार १८, २०७९/०८० मा एक हजार ६९, २०८०/०८१ मा एक हजार दुई सय ८० र २०८१/०८२ मा एक हजार दुई सय २२ जनाले आत्महत्या गरेका छन्। यसरी चार वर्षको अवधिमा आत्महत्याबाट ज्यान गुमाउनेको संख्या चार हजार पाँच सय ८९ पुगेको उहाँले जानकारी दिनुभयो।
आत्महत्याका घटनापछि मात्र कारण खोज्ने प्रवृत्ति रहेकाले घटना हुनुअघि व्यक्ति कुन अवस्थामा थिए भन्नेबारे पर्याप्त अनुसन्धान नहुँदा यस्ता घटनाहरू बढ्दै गएको सहनीको भनाइ छ। उहाँले समयमै यस विषयमा गम्भीर ध्यान दिन आवश्यक रहेकोमा जोड दिनुभयो।
आत्महत्याको बढ्दो दरप्रति सरोकारवाला निकायले चिन्ता व्यक्त गरेका छन्। चिकित्सक कालीप्रसाद यादवका अनुसार आर्थिक समस्या, प्रेम सम्बन्धका जटिलता, पारिवारिक विवाद, बेरोजगारी, मानसिक तनाव, असफलता लगायतका विविध कारणले मानिस आत्महत्यातर्फ उन्मुख हुने गरेका छन्।
सामाजिक, आर्थिक, पारिवारिक तथा मानसिक रूपमा असुरक्षित र अस्वस्थ अवस्थाले पनि आत्महत्याका घटना बढ्न सहयोग पुर्याइरहेको यादवको धारणा छ।
महिला आयोगकी सदस्य तथा अधिकारकर्मी आभासेतु सिंहले समयमै परिवारका सदस्य वा नजिकका साथीभाइले जोखिममा रहेका व्यक्तिका संकेतहरू पहिचान गरी गम्भीर पहल गरेमा आत्महत्याजस्ता दुःखद घटना रोक्न सकिने बताउनुभयो।
यस समस्याको न्यूनीकरणका लागि प्रहरी र सरोकारवाला निकायले नियमित रूपमा सचेतनामूलक अभियान सञ्चालन गर्नुका साथै नयाँ सोच र प्रभावकारी कार्यशैली अपनाउनुपर्ने मनोचिकित्सकहरूको सुझाव रहेको छ। सामाचार साभार गोरखापत्रबाट।
