लहान । सप्तरीको बोदेबरसाइन नगरपालिका–२ का वडा सचिव रामसुन्दर यादवले जन्मदर्ता प्रतिलिपिका लागि सेवाग्राहीसँग घुस लिएको र सो सम्बन्धमा गुनासो गर्न पुगेका जेनजीका सदस्यमाथि कुटपिट गरेको घटना सार्वजनिक भएको छ।
सोमबार जेनजी बोदेबरसाइन नगर संयोजक इन्जिनियर ज्योति कुमार यादवले जिल्ला प्रशासन कार्यालयमा ज्ञापनपत्र बुझाएपछि उक्त घटना बाहिर आएको हो। ज्ञापनपत्रमार्फत उनले वडा सचिवले घुस असुली गरेको र विरोध जनाएपछि जेनजी युवामाथि शारीरिक दुर्व्यवहार भएको आरोप लगाए।
ज्ञापनपत्रमा उल्लेख अनुसार, जन्मदर्ताको प्रतिलिपि बनाउन सेवाग्राही किफायत मियाँसँग वडा सचिवले २,५०० रुपैयाँ मागेका थिए। सेवाग्राहीले ९०० रुपैयाँ बुझाएपछि पनि थप १,६०० रुपैयाँ मागिएको र यही विषयमा गुनासो गर्न जाँदा जेनजी नगर समिति बोदेबरसाइनका कोषाध्यक्ष संजित कुमार साह तथा वरिष्ठ सल्लाहकार सुरेन्द्र प्रसाद साहलाई हातपात र गालीगलौज गरिएको बताइएको छ।जेनजी पक्षले वडा सचिव रामसुन्दर यादव र वडा अध्यक्ष रामप्रसाद रामले फोनमार्फत मान्छे जम्मा गरी युवाहरूमाथि कुटपिट गराएको, मोबाइल खोसेको र धम्की दिएको आरोप पनि लगाए। उनीहरूले वडा अध्यक्ष र सचिवले राजीनामा नदिए आवश्यकताअनुसार चरणबद्ध आन्दोलन गर्ने चेतावनी दिएका छन्।
