सुखिपुर — नेपाली सेनाको नन्दा बक्स गणका गणपति समीर श्रेष्ठको विशेष पहलमा सुखिपुर नगरपालिका वडा नम्बर १० स्थित श्री जनता माध्यमिक विद्यालय दहिपौडीको प्रांगणमा आज मिति २०८२ मंसिर २० गते शनिबार सचेतना तथा स्वास्थ्य जाँच शिविर सम्पन्न भएको छ।
शिविर सुखिपुर रेडक्रसका सभापति तिरपित महतो र सुखिपुर नगरपालिकाका नगरप्रमुख रामऔतार यादवको विशेष उपस्थितिमा सम्पन्न भएको हो। वडा नम्बर १० का वडाध्यक्ष देवनारायण यादवको पहलमा आयोजना गरिएको उक्त कार्यक्रममा स्थानीय नागरिकहरूको उल्लेखनीय सहभागिता रहेको थियो। शिविरमा बिहानैदेखि महिला, बालबालिका, ज्येष्ठ नागरिक तथा सर्वसाधारणको बाक्लो उपस्थिति देखिएको थियो।
शिविरमा प्रादेशिक अस्पताल सिरहा, प्रादेशिक अस्पताल लहान, फुलकुमारी मेमोरियल अस्पताल करजनहा र रेडक्रस लहानबाट आएका चिकित्सक तथा स्वास्थ्यकर्मीहरूले सेवा प्रदान गरेका थिए। गणका सहसेनानी विनोद तिमल्सिनाका अनुसार नाक कान घाँटी, आँखा, दन्त रोग, स्त्री तथा प्रसूति रोग, सामान्य स्वास्थ्य परीक्षण लगायतका सेवा निःशुल्क रूपमा उपलब्ध गराइएको थियो। स्वास्थ्य जाँचसँगै आवश्यक परामर्श तथा प्राथमिक औषधि पनि वितरण गरिएको थियो।
कार्यक्रमको अर्को महत्वपूर्ण पक्षका रूपमा सर्पदंशसम्बन्धी सचेतना प्रदान गरिएको थियो। विशेषगरी तराई क्षेत्रका ग्रामीण बस्तीमा सर्पदंशको जोखिम बढी हुने भएकाले सर्पबाट बच्ने उपाय, सर्प देखिँदा अपनाउनुपर्ने सावधानी तथा सर्प टोकाइपछि तत्काल गर्नुपर्ने प्राथमिक उपचारबारे जनचेतना अभिवृद्धि गरिएको आयोजकले जनाएको छ।
कार्यक्रम उद्घाटनको क्रममा नगरप्रमुख रामऔतार यादवले नेपाली सेनाले सामुदायिक हितका लागि सञ्चालन गर्दै आएको यस्ता कार्यक्रमले जनस्वास्थ्य र चेतनाको विकासमा महत्वपूर्ण योगदान पुर्याइरहेको बताए। वडा अध्यक्ष देवनारायण यादवले दुर्गम तथा सेवा सुविधाबाट टाढा रहेका नागरिकका लागि यस्तो शिविर अत्यन्त उपयोगी भएको उल्लेख गर्दै भविष्यमा पनि यस्तो कार्यक्रम जारी राख्न आग्रह गरे।
नेपाली सेनाको तर्फबाट गणपति समीर श्रेष्ठले नागरिकसँग सम्बन्ध विस्तार र जनस्वास्थ्य प्रवर्द्धन नेपाली सेनाको सामाजिक उत्तरदायित्वको हिस्सा भएको बताउँदै स्थानीय निकाय र स्वास्थ्य संस्थासँग सहकार्य गरी यस्ता कार्यक्रम निरन्तर सञ्चालन गरिने जानकारी दिए।
आयोजकका अनुसार शिविरले स्थानीय नागरिकमा स्वास्थ्यप्रति सचेतना बढाउनुका साथै सामान्य स्वास्थ्य समस्या पहिचान गर्न सहयोग पुगेको छ। स्थानीयवासीले निःशुल्क र सजिलो पहुँचमा स्वास्थ्य सेवा पाएकोमा सन्तोष व्यक्त गरेका छन्।
