काठमाडौं। सिराहाको कमला खोलामा सर्वसाधारणको आवत–जावत सहज बनाउन सरकारले तत्कालका लागि अस्थायी डाइभर्सन निर्माण प्रक्रिया अघि बढाएको छ। हुलाकी सडक निर्देशनालयअन्तर्गत योजना कार्यालय जनकपुरले आइतबार डाइभर्सन निर्माणका लागि ठेक्का आह्वान गर्दै सूचना प्रकाशित गरेको हो।
कार्यालयका अनुसार यो काम इमरजेन्सी प्रकृतिको भएकाले छिटो सम्पन्न गर्नुपर्नेछ। ठेक्का सूचनामा १ महिनाभित्र डाइभर्सन निर्माण सक्नुपर्ने उल्लेख छ।
इञ्जिनियर महतोका अनुसार कमला खोलामा ग्याभियन भराई गरी त्यसैका माथि डेढ मिटर उचाइको संरचना बनाइनेछ। करिब ५० मिटर क्षेत्रमा ह्युम पाइप ओछ्याएर माटो–ग्राभेलले ढाकी अस्थायी बाटो संचालनमा ल्याउने योजना छ।
कमला खोलामा सिराहा र धनुषालाई जोड्ने पुल २०७८ असार १७ गते सञ्चालनमा नआउँदै भासिएको थियो। करिब एउटा दशकपछि बनेको त्यो पुल उद्घाटन हुनै लाग्दा दुर्घटनाग्रस्त बनेको थियो। पुलको सिराहा पक्षका दुई पिलर भासिएर चार स्ल्याब क्षतिग्रस्त भएका मध्ये दुई हटाइएका छन् भने दुई अझै हटाइबाकी छन्।
पुल भासिएपछि पछिल्ला चार वर्षदेखि स्थानीयबासी डुँगाको भरमा जोखिम मोलेर खोला तर्दै आएका छन्।
यही अवस्थाले जनजीवन कष्टकर बन्दै गएपछि पक्की पुल पुनर्निर्माण सम्पन्न नहुँदासम्म उपयोग गर्न सकिने गरी अस्थायी डाइभर्सन निर्माण गर्न लागेको जानकारी अधिकारीहरूले दिएका छन्।
सिराहा–धनुषाका स्थानीयको गुनासो तथा मधेश प्रदेश GENZ संयोजक शिव यादवको आग्रहपछि भौतिक पूर्वाधार तथा यातायात मन्त्री कुलमान घिसिङ, खेलकुद मन्त्री बब्लु गुप्ता, GENZ अगुवा सुदन गुरुङलगायतको टोलीले मंसिर ५ गते स्थल निरीक्षण गरेको थियो।
मन्त्री घिसिङले स्थायी पुल बन्ने समयसम्म जनताका लागि सुरक्षित अस्थायी संरचना निर्माण गर्ने आश्वासन दिएका थिए।
उनकै निर्देशनअनुसार अहिले डाइभर्सन निर्माण अघि बढाइएको हो।
हुलाकी राजमार्गअन्तर्गत सिराहा–जनकपुर दूरी ३१ किमी मात्रै रहेको छ। कमला खोलाको पुल सञ्चालनमा रहेमा सिराहा सदरमुकामबाट जनकपुर पुग्न करिब आधा घण्टा लाग्थ्यो। तर पुल भासिएपछि हाल जनताले महेन्द्र राजमार्ग हुँदै करिब ९० किमी मार्ग पार गर्न बाध्य छन्।
कमला खोलाको पुल निर्माणका लागि सरकारले २०६८ जेठ २४ गते पप्पु–लुम्बिनी जेभीसँग २४ करोड ९१ लाख रुपैयाँमा ठेक्का सम्झौता गरेको थियो। सम्झौताअनुसार २०७१ मंसिरमा पुल सकिनुपर्थ्यो, तर निर्माण व्यवसायीले पटक–पटक म्याद थपेर पनि काम सम्पन्न गर्न सकेन।
आठौँ पटक म्याद थपिएको अवधि गत असारमा सकिएको छ। निर्माण कम्पनीले फेरि म्याद बढाइदिन प्रस्ताव गरेको भए पनि सरकारले हालसम्म निर्णय नगरेको बताइएको छ।
हालसम्म कुल २० करोड ४३ लाख रुपैयाँ (भ्याटसहित) भुक्तानी भइसकेको छ। पुलको भौतिक प्रगति ८३ प्रतिशत र वित्तीय प्रगति ८२ प्रतिशत रहेको कार्यालयले जनाएको छ।
१२ स्पान रहेको ४६९ मिटर लामो सो पुल डिजाइन–बिल्ड मोडमा ठेक्का गरिएको हो। पुलसँगै दुवै किनारमा १३०० मिटर नदी नियन्त्रण संरचना र २०० मिटर पहुँच मार्ग निर्माण गर्नुपर्नेछ।
साभार – क्लिकमाण्डु डटकम बाट
