ढल्केवर, असोज ८ गते ।
सिरहाको कल्याणपुर नगरपालिका–९, डुमरीमा मनिषा सिपमूलक तालिम केन्द्रद्वारा ३५ दिने सिलाइ–कटाइ तालिम सुरु गरिएको छ । एक विशेष समारोहबीच सामाजिक एवं मगही भाषा अभियन्ता फुलगेन मगहीको प्रमुख आतिथ्यमा उक्त तालिमको औपचारिक शुभारम्भ गरिएको हो ।
उद्घाटन समारोहमा स्थानीय जनप्रतिनिधि, समाजसेवी, सञ्चारकर्मी, बुद्धिजीवी तथा तालिममा सहभागी महिलाहरूको उपस्थिति रहेको थियो । कार्यक्रममा वक्ताहरूले आधुनिक युगमा महिलाहरूलाई आर्थिक रुपमा सबल र आत्मनिर्भर बनाउन सीपमूलक तालिमले महत्वपूर्ण योगदान गर्ने धारणा राखेका थिए ।
आयोजक मनिषा सिपमूलक तालिम केन्द्रका एक पदाधिकारीले तालिमको माध्यमबाट महिलाहरूलाई स्वरोजगार गर्ने बाटो खोल्न सकिने विश्वास व्यक्त गरे । उनका अनुसार, सहभागीले आधारभूतदेखि सीपमूलक स्तरसम्मको सिलाइ–कटाइ सम्बन्धी ज्ञान आर्जन गर्नेछन् । यसले महिलाहरूलाई घरेलु खर्च चलाउन सहयोग गर्ने मात्र नभई आफ्नो क्षेत्रमा उद्यमशीलता बढाउन समेत मद्दत गर्ने अपेक्षा गरिएको छ ।
३५ दिनसम्म सञ्चालन हुने तालिममा महिलाहरूलाई लुगा सिलाइ–कटाइ, नयाँ ढाँचा तयार गर्ने, कपडाको प्रयोग दक्षता बढाउने लगायतका विषयमा प्रशिक्षण दिइने छ । तालिमपछि सहभागीले प्राप्त सीपलाई प्रयोग गरी स्वरोजगार सिर्जना गर्ने र आफ्नो समुदायलाई समेत योगदान पुर्याउने आयोजकको भनाइ छ ।
