जनकपुरधाम, असोज ७ गते ।
सिरहामा दुईदिन अघि अपहरणमा परेका बालकको हत्या भएको छ । सिरहाको गोलबजार नगरपालिका १३ भेल्हा डंगराहाका संजय सिंहका छोरा १५ वर्षीय अभिषेक सिंहको हत्या भएको अवस्थामा शव फेला परेको हो ।
आज बिहान बालकको शव घर भन्दा केही पर आँप बगैँचामा फेला परेको जिल्ला प्रहरी कार्यालय सिरहाका सूचना अधिकारी प्रहरी निरीक्षक धर्मेश कुमार यादवले बताए ।
घटनाको अनुसन्धान थालिएको र डग टोलि बोलाउने तयारी भएको उनले बताए । परिवारजनका अनुसार अभिषेक गत आइतबार राति ८ बजे बेपत्ता भएका थिए । परिवारले रातभरि खोजतलास गर्दा पनि फेला परेनन् । सोमबार बिहान करिब ८ बजे अभिषेकको मोबाइलबाट आमाको मोबाइलमा अपहरण भएको र ५ करोड फिरौती मागिएको म्यासज आएको थियो ।
यस बारे परिवारजनले प्रहरीमा खबर गरेका थिए । प्रहरीमा हिजो नै खबर आएको सूचना अधिकारी यादवले पुष्टि गरे । अपहरणकारीले पाँच करोड फिरौती दिँदा छाडिदिने र प्रहरी वा कसैलाई यस बारे जानकारी दिँदा हत्या गरिदिने धम्की समेत दिएका थिए ।
