सिराहा, साउन १६।
सिराहा प्रादेशिक अस्पतालले रेडक्रस सोसाइटीसँग ब्लड बैंक सञ्चालन गर्ने नाममा एक वर्षअघि जिम्मा लिएको भवन अहिलेसम्म प्रयोगमा आउन सकेको छैन। न त भवन मर्मत गरिएको छ, न त आवश्यक पूर्वाधार तयार पारिएको छ। प्रशासनको लापरबाही र जीर्ण संरचनाको कारण जिल्लाको जनस्वास्थ्यमा प्रत्यक्ष असर पर्न थालेको छ।
अस्पतालका अध्यक्ष शोहिन्द्र यादवले पटक–पटक छिट्टै ब्लड बैंक सञ्चालनमा ल्याइने सार्वजनिक प्रतिबद्धता जनाउँदै आएका थिए। प्रशासन, जनप्रतिनिधि र सर्वसाधारणसामु उनले ब्लड बैंक छिट्टै सुरु गर्ने बताएका थिए। तर, एक वर्ष बितिसक्दा समेत भवन जस्ताको त्यस्तै छ , र कुनै ठोस पहल पनि देखिएको छैन।
अस्पतालका एक कर्मचारीले नाम गोप्य राख्ने शर्तमा बताएअनुसार, अध्यक्ष यादव आफैं अस्पतालका स्रोतसाधनको व्यक्तिगत प्रयोगमा लिप्त छन्। “सरकारी गाडी एम्बुलेन्स र मेडिकल सुपरिन्टेन्डेन्टका लागि तोकिए पनि उनी त्यसलाई सुखीपुरस्थित आफ्नै घर जान वा व्यक्तिगत काममा प्रयोग गर्छन्,” उनले भने। यस्तो गैरजिम्मेवार प्रवृत्तिले अस्पतालको सेवा प्रवाहमा बाधा पुर्याएको आरोप छ।
स्थानीय सामाजिक अभियन्ता र युवाहरूले अध्यक्ष यादवको नेतृत्वप्रति गम्भीर प्रश्न उठाएका छन्। “हामीले विश्वास गर्यौं, तर उहाँको कार्यशैलीले हामीलाई निराश बनाएको छ,” स्थानीय युवा सुमित यादवले भने, “ब्लड बैंक नहुँदा रगतको अभावकै कारण मान्छेहरू ज्यान गुमाइरहेका छन्।”
सिराहामा दैनिकजसो सवारी दुर्घटना, आपतकालीन सुत्केरी सेवा र अन्य स्वास्थ्य समस्या हुँदा रगतको माग अत्यधिक हुन्छ। तर ब्लड बैंक नहुँदा बिरामीहरूलाई लहान, जनकपुर वा विराटनगरसम्म रगत खोज्न जानुपर्ने बाध्यता रहेको छ। समयमै रगत नपाउँदा ज्यान गुमाउने घटना समेत भइरहेका छन्।
रेडक्रसले जिम्मा दिएको भवन अहिले जीर्ण अवस्थामा छ। आवश्यक उपकरणहरू छैनन्, भित्ताहरू खियाएका छन्, र रंगरोगन समेत गरिएको छैन। अस्पताल प्रशासनको कुनै ठोस पहल नदेखिनु थप निराशाजनक रहेको स्थानीयको गुनासो छ।
स्थानीय बासिन्दा जितेश कर्ण भन्छन्, “नेताको भाषण होइन, जनताले सेवा चाहेका छन्। जिम्मा लिएको हो भने सेवा दिनुपर्छ, अन्यथा त्यो जनताको स्वास्थ्यसँग खेलवाड हो।”
युवा नेता अरविन्द यादवले सरकार, प्रदेश स्वास्थ्य मन्त्रालय र सम्बन्धित निकायले तत्काल हस्तक्षेप नगरे सिराहावासीले यसको ठूलो मूल्य चुकाउनु पर्ने चेतावनी दिएका छन्। “अब प्रशासनले जवाफदेही बन्नुपर्छ, अन्यथा जनदबाब अपरिहार्य हुनेछ,” उनले भने ।
सामाचार साभार – भूमीपोष्ट डटकम बाट ।
