सिरहा जिल्लाको प्रतिनिधि सभा क्षेत्र नं. २ का संभावित उम्मेदवार तथा जनमत पार्टीका जिल्ला इञ्चार्ज श्री बिनोद यादवले सुखीपुर नगरपालिका वडा नं. ६ स्थित रामजानकी मन्दिर परिसरमा सामुदायिक भवन निर्माणको शिलान्यास गर्नु भएको छ। चार कोठे यस भवन निर्माण भएपछि स्थानिय बासिन्दाहरूको सामूहिक तथा सामाजिक कार्यक्रमहरू जस्तै भोज-भतेर, विवाह, छेका, पञ्चायत तथा अन्य धार्मिक–सांस्कृतिक गतिविधिहरू सहज रूपमा सञ्चालन गर्न सकिनेछ।
शिलान्यास कार्यक्रममा बोल्दै नेता यादवले सामाजिक विकास र समुदायबीच आपसी समन्वय अभिवृद्धि गर्ने उद्देश्यले यस्तो भवनको आवश्यकता रहेको बताउनु भयो। उहाँले यसै भवन नजिकै रहेको आफ्नो निजी जग्गामा भविष्यमा आधुनिक सुविधा सम्पन्न Marriage Hall तथा Party Place निर्माण गर्ने इच्छा पनि व्यक्त गर्नुभयो। “स्थानीय तहमा सार्वजनिक स्थलहरूको अभाव छ। समाजलाई जोड्ने यस्ता पूर्वाधारले नाता, सम्बन्ध र सहयोगको भावना अझ प्रगाढ बनाउँछ,” यादवले भन्नुभयो।
उक्त कार्यक्रममा रामजानकी मन्दिरका सन्त-महन्त, स्थानीय युवाहरू, नागरिक समाजका प्रतिनिधिहरू, वडा कार्यालयका पदाधिकारीहरू लगायत विभिन्न समुदायका व्यक्तिहरूको उत्साहजनक उपस्थिति थियो। स्थानीयवासीहरूले नेता यादवको यस कदमको स्वागत गर्दै सार्वजनिक हितमा गरिएको योगदानलाई उच्च मूल्यांकन गरेका छन्। सामाजिक कार्यमा निरन्तर सक्रिय रहँदै आएका यादव जनतामाझ लोकप्रिय युवा बुद्धिजीवी नेताका रूपमा परिचित छन्। उक्त भवन निर्माण कार्य चाँडै सुरु गरिने र केही महिनाभित्र सम्पन्न गरिने योजना रहेको यादवको भनाइ छ।
