सिरहा । सिरहाको नवराजपुर गाउँपालिका–१ भगवतीपुरकी रिंकु कुमारी सदायको जबरजस्ती करणी तथा हत्या प्रकरणले समग्र समाजलाई स्तब्ध बनाएको छ । घटनापछि पीडित परिवार न्यायका लागि संघर्षरत रहेको बेला नेकपा माओवादी केन्द्रका उपमहासचिव एवम् मधेस प्रदेश इन्चार्ज मातृका प्रसाद यादव पीडित परिवारलाई भेट्न पुगेका छन् ।
शुक्रबार यादव मृतक रिंकुको घर पुगी उनका बुवा बिजूल सदाय र आमासँग भेट गरी घटनाको कानूनी लडाइँमा पूर्ण समर्थन र सहयोग रहने प्रतिबद्धता जनाएका छन् । उनले यो घटना समाजमा विद्यमान सामन्ती सोच र उत्पीडित वर्गमाथि भइरहेका अत्याचारको निरन्तरता भएको बताउँदै भने,–“रिंकु कुमारी सदायको कानूनी लडाइँ हाम्रो पनि लडाइँ हो।” दलित तथा सम्पूर्ण उत्पीडित समुदायको सामाजिक, आर्थिक र राजनीतिक सबलीकरण नै यस्ता घटनाविरुद्ध लड्ने सबैभन्दा प्रभावकारी उपाय भएको बताए ।
उनले शून्य सहनशीलता नीति अपनाउँदै समाजमा हुने कुनै पनि भेदभाव, अत्याचार तथा आपराधिक गतिविधिको अन्त्य गर्न सम्पूर्ण जनसमुदायलाई आग्रह गरे । “कमजोर वर्गमाथि हुने अन्यायलाई स्थानीय ‘पञ्च’ हरूको पञ्चायती मिलापबाट मुक्त गरी कानूनी दायरामा ल्याउनु अपरिहार्य छ,” यादवले जोड दिए ।
उनले यस प्रकरणलाई अन्यायको सामान्यीकरण गर्ने प्रयासहरूसँग सचेत रहनुपर्ने बताउँदै दोषीहरूलाई कडा कानूनी कारबाहीको दायरामा ल्याउन सरोकारवाला निकायहरूलाई तत्काल पहल गर्न आग्रह गरे ।
क्रान्तिकारी नेताका रूपमा परिचित पुर्वमन्त्री यादवले यो घटना सम्पूर्ण उत्पीडित वर्ग र न्यायप्रेमी समाजका लागि चुनौती भएको उल्लेख गर्दै न्याय नपाएसम्म संघर्ष जारी रहने स्पष्ट पारे । साभार – नागरिक मिररडटकम बाट
