विराटनगर । इन्फिनिटी ल्याब नेपालले रोटरी क्लब अफ हिमालयन गोल्फर्सको सहयोगमा मुसहर समुदायका समर्पित शिक्षक राज क्षेत्रीलाई विशेष रूपमा निर्मित विद्युतीय ट्राइसाइकल हस्तान्तरण गरेको छ।
एक कार्यक्रमकाबिच उनलाई ट्राइसाइकल हस्तान्तरण गरिएको हो । शारीरिक कठिनाईका बाबजुद पनि क्षेत्री मुसहर समुदायका लागि आशाको किरण बनेका छन् । उनले आफ्नो जीवन २६ बालबालिकाको शिक्षाका लागि समर्पित गर्दै आइरहेका छन्।
हरेक दिन ७ किलोमिटर दूरी आफ्नो म्यानुअल ट्राइसाइकल चलाएर पार गर्ने राज शारीरिक कठिनाइका बावजुद विद्यार्थीहरूको शिक्षालाई निरन्तरता दिन कटिबद्ध छन्।
राजले झेलिरहेका शारीरिक कष्ट र कठिनाइलाई बुझ्दै रोटरी क्लब अफ हिमालयन गोल्फर्सले सहयोगको हात अगाडि बढायो। इन्फिनिटी ल्याब नेपालसँगको सहकार्यमा राजका आवश्यकता अनुरूप विशेष विद्युतीय ट्राइसाइकल निर्माण गरियो।
नेपालका दुर्गम भौगोलिक क्षेत्रमा पनि सहजै चलाउन सकिने गरी तयार गरिएको यो विद्युतीय ट्राइसाइकलले राजको शारीरिक परिश्रमलाई कम गर्दै उनको शिक्षाको अभियानलाई अझै प्रभावकारी बनाएको छ।
“सबैका लागि चलायमानता र पहुँच” भन्ने लक्ष्यसहित स्थापना भएको इन्फिनिटी ल्याब नेपालले भूकम्पपछि अशक्त बनेका मानिसहरूका लागि विशेष समाधान निर्माण गर्दै आइरहेको छ। “यो ट्राइसाइकल मेरो लागि चलायमान उपकरण मात्र होइन, जीवनको आधार हो। यसले मलाई विद्यार्थीहरूलाई पढाउन सहज बनाएको छ। म रोटरी क्लब अफ हिमालयन गोल्फर्स र इन्फिनिटी ल्याबप्रति आभारी छु।” राजले भने ।
रोटरी क्लबका अध्यक्षले भने “शिक्षा उज्ज्वल भविष्यको जग हो, र राजले समर्पणको असल उदाहरण प्रस्तुत गर्नुभएको छ। उहाँको कार्यको समर्थन गर्न पाउनु हाम्रो लागि गर्वको विषय हो।”
इन्फिनिटी ल्याबका संस्थापक सुनिल परियारले राजको संघर्ष र निःस्वार्थताको कथा प्रेरणादायी रहेकाले उनको यात्रा सहज बनाउन पाएकोमा खुशी लागेको बताए । उनले यो परियोजनाले राजको जीवन मात्र सहज बनाएको छौ, मुसहर समुदायका बालबालिकाहरूमा आशाको नयाँ किरण देखिएको छ । यो सहकार्यले चुनौतीलाई अवसरमा बदल्न कसरी सम्भव छ भन्ने देखाएको छ।
विद्युतीय ट्राइसाइकलमा नयाँ यात्रा सुरु गर्दै गर्दा राजको अभियानले समुदायका लागि उज्यालो भविष्यको बाटो खनिरहेको छ। यो सहयोग, समर्पण र सहकार्यको कथा, असहायलाई सशक्त बनाउन संस्थाहरूले कसरी सकारात्मक भूमिका खेल्न सक्छन् भन्ने उत्कृष्ट उदाहरण हो।
