सिरहा जिल्लाको लाहान नगरपालिका अन्तर्गत बासाजोडी, पकडिया गढको मुख्य सडकमा रहेको ठूलो सखुवाको रुखको कारण आवतजावतमा समस्या उत्पन्न भएको छ । स्थानिय जनताको अनुसार यो रुख मुख्य सडकको बीचमै छ, जसले गर्दा यातायातमा बाधा पुगेको छ भने दुर्घटनाको जोखिम पनि उत्तिकै रहेको छ ।
खासगरी भारी यातायातका साधन र एम्बुलेन्सजस्ता आपतकालीन सेवाका सवारीहरू आवागमनमा ठूलो समस्या सामना गरिरहेका छन् ।
स्थानिय बासिन्दाहरूले धेरैपटक सम्बन्धित निकायलाई समस्या समाधानका लागि आग्रह गरेपनि हालसम्म कुनै पहल नभएको गुनासो गरेका छन् । यसले गर्दा यात्रुहरूमाझ असन्तोष बढिरहेको छ ।
डिभिजन वन कार्यालयको भूमिका
सखुवाको रुखलाई संरक्षणको दृष्टिकोणले हेर्नुपर्ने भए पनि, यसको व्यवस्थापनमा चासो नदेखाउनु डिभिजन वन कार्यालय लहानको लापरवाहीलाई इंगित गर्दछ । रुखको स्थान र स्थिति नियालेर तत्काल व्यवस्थापन गरिनुपर्ने स्थानियहरूको माग छ ।
वन ऐन, २०७६ अनुसार सार्वजनिक स्थानमा रहेका रुखहरू संरक्षण र व्यवस्थापनको जिम्मेवारी वन कार्यालयको हो । तर, हालको अवस्थामा यो जिम्मेवारी निर्वाह हुन नसक्दा स्थानीय समुदायले वन कार्यालयको गम्भीर ध्यानाकर्षण गराउन आग्रह गरेका छन् ।
पकडिया गढ क्षेत्रका स्थानीयवासी रामेश्वर यादवले भने, “यो रुखले हामीलाई निकै समस्या भएको छ । बच्चाहरू विद्यालय जान गाह्रो भएको छ भने साँझपख यस क्षेत्रमा दुर्घटनाको खतरा झन् बढी हुन्छ ।”
त्यस्तै, सवारी चालक सुरेन्द्र चौधरी भन्छन्, “यो रुखले बाटो साँघुरो बनाएको छ । ठूला गाडी जान गाह्रो भएको छ । तत्काल केही नगरे यसले ठूला दुर्घटना निम्त्याउने छ ।”
यस क्षेत्रबाट दैनिक सयौं सवारी साधन ओहोरदोहोर गर्छन् । त्यसमध्ये रातको समयमा सवारी साधनका चालकहरूले रुखको स्थिति देख्न नसक्दा दुर्घटना हुने सम्भावना उच्च छ ।
समस्याको तत्काल समाधानका लागि डिभिजन वन कार्यालयले स्थानमा गएर निरीक्षण गरी रुखलाई व्यवस्थित रूपमा व्यवस्था गर्नुपर्ने देखिन्छ । साथै, यस प्रक्रियामा स्थानिय निकाय र जनसमुदायको समेत सहभागिता गराउनुपर्ने आवश्यकता छ ।
लहानको बासाजोडीस्थित मुख्य सडकमा रहेको सखुवाको रुखले सिर्जना गरेको समस्याको समाधान गर्न सम्बन्धित निकायको ध्यानाकर्षण अत्यावश्यक छ । समयमै उचित कदम चालिएन भने यो समस्या स्थानीयवासीका लागि मात्र नभई समग्र यातायात प्रणालीका लागि गम्भीर चुनौती बन्न सक्छ ।
