कार्तिक २४ ।
कपिलवस्तुको इलाका प्रहरी कार्यालय महाराजगन्जका प्रमुख प्रहरी नायब निरीक्षक चित्रवीर केसीमाथि संगीन आरोपहरू लागेका छन्। उनी र उनका सहयोगी घुमुवा प्रहरी सहायक हवल्दार किरन प्रसाद हरिजन चोरीको मोटरसाइकल चलाएर तस्करीलाई प्रश्रय दिइरहेको खुलासा भएको छ। तथ्य अनुसार, केसीले चढने मोटरसाइकल (रा ६ प ७९८९) चोरीको रहेको पुष्टि भएको छ। मोटरसाइकल घुमुवा किरणले चलाउने र केसी पछाडि बस्ने गरेको दृश्य महाराजगन्जका आम नागरिकले दैनिक हेर्ने गरेका छन । यो मात्रै होइन, केसी र हरिजनको नजिकका तस्करहरूसँग राम्रो सम्बन्ध रहेको र महाराजगन्जका विभिन्न नाकाबाट हुने तस्करीमा उनीहरूको सहकार्य रहेको स्थानीयहरु बताउँछन् ।
विशेषगरी हर्दौना, मुजेहना, कोटिया जस्ता नाकाहरूबाट लुकिछुपी आइपुग्ने तस्करीको सामान, महाराजगन्ज हुँदै चन्द्रौटा, खरेन्द्रपुर, डुमरा, इमिलिया जस्ता स्थानसम्म निर्बाध रुपमा पुग्ने गरेको स्थानीयहरुले बताउँछन् । केसी जिल्लाको मर्यादपुर प्रहरीको चौकीको इन्चार्ज हुँदा पनि तस्करहरुको सेटिङमा कारोबार गराएको अलोचित भएका थिए । महाराजगन्जमा पनि प्रहरीको जिम्मेवारीमा भए देखि तस्करीसँग मिलेमतो गरेको आरोपका कारण चित्रवीर केसी र उनको टिम आलोचनामा परेका छन्। यस घटनाले प्रहरी संगठनकै छविमा गम्भीर प्रश्न उठाएको छ ।
