पूर्वी धनुषाको कमला नगरपालिका–२ तेलियाहामा एक दुखद घटना सार्वजनिक भएको छ, जहाँ छोराको पक्राउपछि आमा शोक सहन नसकी निधन भएकी छन्।
स्थानीय रामकिशुन दासकी ५५ वर्षीया श्रीमती बिना देवी दासले छोरामाथि मुद्दा दर्ता भई पक्राउ परेपछि गहिरो मानसिक तनावका कारण शुक्रबार दिउँसो प्राण त्यागेको परिवारजनले बताएका छन्। उनका छोरा चन्दन दासलाई गत वैशाख १० गते लगमा बजारबाट प्रहरीले पक्राउ गरेको थियो। उनीमाथि ज्यान मार्ने उद्योगको आरोपमा मुद्दा दर्ता गरिएको छ।
घटनाको सुरुवात फागुन ६ गते राति करिब ९ बजेतिर एक विवाह समारोहअन्तर्गत मटकोर कार्यक्रममा भएको सामान्य विवादबाट भएको बताइएको छ। डिजेमा नाच्ने विषयलाई लिएर दुई पक्षबीच झगडा भएको थियो। चन्दन दास पक्षका अनुसार, स्थानीय दिपेश पूर्वेले मादक पदार्थ सेवन गरी असामाजिक व्यवहार गरेपछि विवाद चर्किएको थियो। बीयरको बोतल फुटाउँदा एक युवती र उनकी आमासमेत घाइते भएको दाबी गरिएको छ। त्यसपछि स्थिति झनै उग्र भई कुटाकुटमा परिणत हुँदा दिपेश पूर्वे गम्भीर घाइते भएका थिए।
दुवै पक्षबीच विवादपछि गाउँमै मिलाउने प्रयास गरिए पनि पछि राजनीतिक रंगसमेत थपिएको बताइन्छ। फागुन २१ गतेको निर्वाचन सन्दर्भमा मत दिन दबाब दिएको आरोप र प्रत्यारोपबीच झगडा भएको दुवै पक्षको भनाइ छ। हाल दिपेश पूर्वे भारत गएको बताइएको छ।
चन्दन दास पक्राउ परेपछि उनलाई छुटाउन विभिन्न जनप्रतिनिधिहरूले पहल गरेको भए पनि मुद्दा दर्ता भइसकेपछि प्रक्रिया अगाडि बढेको थियो। यता, छोराको चिन्तामा बिना देवी दासले विगत ९ दिनदेखि खाना समेत नखाई निरन्तर रोइरहेकी थिइन्। अत्यधिक तनावका कारण उनलाई हृदयघात भएको र त्यसकै कारण मृत्यु भएको परिवारजनको दाबी छ।
इलाका प्रहरी कार्यालय खजुरीको हिरासतमा रहेका चन्दन दासका दुई छोरी र एक छोरा छन्। आर्थिक रूपमा कमजोर दलित परिवारका उनीहरू जीविकोपार्जनका लागि अरूको खेतमा काम गर्ने गरेका छन् भने चन्दन बजारमा व्यापारीहरूको रकम संकलन गर्ने काम गर्थे।
परिवारले विभिन्न नेताहरूलाई सहयोगका लागि आग्रह गरे पनि सुनुवाइ नभएको गुनासो गरेका छन्। साथै, दिपेश पूर्वे एक राजनीतिक दल निकट रहेको र सोही दबाबमा मुद्दा दर्ता गरिएको आरोपसमेत लगाइएको छ।
प्रहरीका अनुसार, उक्त घटनामा थप ७ जनालाई प्रतिवादी बनाइएको छ, जसमा अन्य आरोपीहरू भने हाल फरार रहेका छन्।
