सिरहामा बालबालिकाको पोषण अवस्थाबारे विस्तृत जानकारी संकलन गर्न ‘राष्ट्रिय पोषण लेखाजोखा अभियान’ सुरु गरिएको छ। देशव्यापी रूपमा सञ्चालन भइरहेको यस अभियान अन्तर्गत जिल्लाका सबै १७ वटै पालिकामा बालबालिका र सुनौलो हजार दिनका आमाहरूको पोषण अवस्था मूल्याङ्कन गरिँदैछ। 
दलित विकास मञ्च, गोलबजारले Helen Keller International को आर्थिक सहयोग तथा स्थानीय पालिकाहरूको समन्वयमा ‘जीवनका लागि पोषण कार्यक्रम’ अन्तर्गत यो अभियान सञ्चालन गरेको हो। अभियानमार्फत ६ महिनादेखि ५९ महिनासम्मका करिब ६० हजार बालबालिका तथा करिब १४ हजार सुनौलो हजार दिनका आमाहरूको पोषण अवस्था परीक्षण गरिने लक्ष्य राखिएको छ।
मञ्चका कार्यकारी निर्देशकका अनुसार बालबालिकाको उचाइ, तौल तथा पाखुराको मध्य भागको परिधि (MUAC) मापन गरेर कुपोषणको अवस्था पहिचान गरिनेछ। यसबाट मध्यम तथा कडा प्रकारका कुपोषण भएका बालबालिकालाई समयमै पहिचान गरी उपचारमा सहयोग पुग्ने अपेक्षा गरिएको छ। अभियान वैशाख १५ देखि ३० गतेसम्म सञ्चालन हुनेछ।
अभियानका क्रममा महिला सामुदायिक स्वास्थ्य स्वयंसेविका तथा स्वास्थ्य संस्थामार्फत घरघरमै पुगेर बालबालिकाको पोषण परीक्षण गरिनेछ। साथै, आवश्यक परेमा ‘तयारी उपचारात्मक खाना’ (Ready-to-Use Therapeutic Food) निःशुल्क रूपमा उपलब्ध गराइने जनाइएको छ।
यो कार्यक्रम स्वास्थ्य संस्था, खोप केन्द्र, सामुदायिक क्लिनिक, वडा कार्यालय, सामुदायिक भवन तथा प्रारम्भिक बाल विकास केन्द्रहरूमा सञ्चालन हुने छ। औरही गाउँपालिकासहित जिल्लाभरका सबै वडामा कुपोषणको शीघ्र पहिचान र समयमै व्यवस्थापन गर्नु नै अभियानको मुख्य उद्देश्य रहेको छ।
