जनकपुरधाम। धनुषाको औरही गाउँपालिका–६ मा चक्करदेखि सोनिगामा जोड्ने भित्री सडकखण्ड नजिक एक युवकको हत्या गरिएको अवस्थामा शव फेला परेको छ।
मृतक हंसपुर नगरपालिका–९ फुलबरियाटोल निवासी गंगाराम मण्डलका करिब १९ वर्षीय छोरा सुमित मण्डल रहेको प्रहरीले जनाएको छ।
प्रहरीका अनुसार उनी सडकबाट करिब ३०० मिटर पूर्वतर्फ रहेको खेतमा घोप्टो अवस्थामा मृत भेटिएका थिए। शवको पछाडिपट्टि दुवै हात गम्छा र डोरीले बाँधिएको तथा घाँटी रेटिएको अवस्थामा भेटिएकाले घटनालाई हत्या भएको आशंका गरिएको छ।
घटनाको सूचना पाएलगत्तै प्रहरी टोली घटनास्थलमा पुगेर अनुसन्धान सुरु गरेको छ। हत्या कसले र किन गर्यो भन्ने विषयमा विस्तृत छानबिन भइरहेको प्रहरीले जनाएको छ।
