सिरहा । जिल्लाको बरियारपट्टी गाउँपालिका–८ स्थित श्री राम जानकी समाज कल्याण फाउन्डेशन (मन्दिर) मा धार्मिक तथा आध्यात्मिक वातावरण निर्माण गर्ने उद्देश्यले “सीताराम नाम महायज्ञ” आयोजना हुने भएको छ।
आयोजक समितिका अनुसार २०८२ साल चैत ०५ गतेदेखि १५ गतेसम्म सञ्चालन हुने उक्त महायज्ञमा विभिन्न धार्मिक कार्यक्रमहरु आयोजना गरिनेछन्। महायज्ञको उद्घाटनका लागि चैत ०५ गते बिहान ८ बजे भव्य कलश यात्रा निकालिने कार्यक्रम तय गरिएको छ।
महायज्ञ अन्तर्गत १७ वटा कीर्तन कुञ्जमा अखण्ड सीताराम नाम जप, १० दिनसम्म संगीतमय रामायण पाठ, वैदिक हवन तथा यज्ञ अनुष्ठान, सत्संग एवं आध्यात्मिक प्रवचन, भजन–कीर्तन तथा नामधुन जस्ता कार्यक्रम सञ्चालन हुने आयोजकले जनाएको छ। साथै भक्तजनका लागि विभिन्न देवप्रतिमाहरुको दर्शनको व्यवस्था समेत गरिने बताइएको छ।
आयोजकका अनुसार सामाजिक क्षेत्रको सुख–शान्ति, समृद्धि तथा आध्यात्मिक उन्नतिको कामनासहित महायज्ञको आयोजना गरिएको हो। कार्यक्रममा सहभागी भई नामजप, कीर्तन तथा सेवामा सहभागी हुन सम्पूर्ण धर्मप्रेमी श्रद्धालुहरुलाई आयोजकले आग्रह गरेको छ।
महायज्ञ सम्बन्धी थप जानकारीका लागि ९८२४७१७९९५, ९८१५४१४२३४, ९८१४७५१४०१ र ९७००१८८८३२ नम्बरमा सम्पर्क गर्न सकिने आयोजकले जनाएको छ।
