लहान, असार १६ — मुस्लिम समुदायका महिलाको आर्थिक तथा सामाजिक सशक्तीकरण गर्ने उद्देश्यले सिरहाको भगवानपुर गाउँपालिका–२ गमहरियास्थित मुस्लिम टोलमा सञ्चालन गरिएको १५ दिने गुडिया (खेलौना) बनाउने सीपमूलक तालिम सम्पन्न भएको छ।“सीप सिकौं, स्वरोजगार बनौं” भन्ने मूल नारासहित सप्तरीको विष्णुपुर गाउँपालिका–४ स्थित विकासका अग्रसर पाइलाहरू संस्थाको आयोजनामा तथा भगवानपुर गाउँपालिका, सिरहाको आर्थिक सहयोगमा असार १ गतेदेखि १५ गतेसम्म तालिम सञ्चालन गरिएको थियो।तालिमको समापन समारोहमा भगवानपुर गाउँपालिकाका अध्यक्ष उग्र नारायण यादव प्रमुख अतिथिका रूपमा सहभागी हुनुभएको थियो। कार्यक्रम वडा नं. २ का वडा अध्यक्ष सूर्य नारायण यादवको अध्यक्षतामा सम्पन्न भएको थियो। कार्यक्रममा स्थानीय दिदीबहिनी, सामाजिक अगुवा, प्रशिक्षक तथा सहभागी महिलाहरूको उल्लेखनीय उपस्थिति रहेको थियो।समारोहलाई सम्बोधन गर्दै गाउँपालिका अध्यक्ष यादवले महिलाको आर्थिक सशक्तीकरणलाई समृद्ध समाज निर्माणको आधारका रूपमा व्याख्या गर्नुभयो। महिलाले सीप हासिल गरी आफ्नै घरबाट सानो लगानीमा व्यवसाय सञ्चालन गर्न सक्ने वातावरण सिर्जना गर्नु स्थानीय सरकारको प्राथमिकतामध्ये एक रहेको उहाँले बताउनुभयो।
उहाँले तालिमबाट सिकेको ज्ञान र सीपलाई व्यवहारमा उतार्दै आयआर्जनको माध्यम बनाउन सहभागी महिलाहरूलाई आग्रह गर्नुभयो। “सीप जीवनभर साथ दिने सम्पत्ति हो। यही सीपको माध्यमबाट महिलाहरू आत्मनिर्भर बन्न सक्छन्, परिवारको आर्थिक अवस्था सुधार्न सक्छन् र समाजमा सम्मानित जीवनयापन गर्न सक्छन्,” उहाँले भन्नुभयो।अध्यक्ष यादवले मुस्लिम समुदायका चेलीबेटीको शिक्षा र सशक्तीकरणमा विशेष जोड दिँदै कम्तीमा १८ वर्ष उमेर पूरा भएपछि मात्र विवाह गर्नुपर्ने सन्देश पनि दिनुभयो। बालविवाहले शिक्षा, स्वास्थ्य, रोजगारी तथा समग्र भविष्यमा नकारात्मक असर पार्ने भएकाले छोरीहरूलाई शिक्षित र सक्षम बनाउन सबै अभिभावकलाई आग्रह गर्नुभयो।कार्यक्रममा राजेन्द्र प्रसाद यादव, कृष्ण देव यादव, रहमान मियाँ तथा तालिमकी प्रशिक्षक रिता महतो लगायतले शुभकामना व्यक्त गरेका थिए। वक्ताहरूले महिलालाई सीपसँग जोड्ने यस्ता कार्यक्रमले गरिबी न्यूनीकरण, घरेलु उद्योग विकास तथा स्थानीय उत्पादन प्रवर्द्धनमा महत्वपूर्ण योगदान पुर्याउने विश्वास व्यक्त गरे।तालिमकी प्रशिक्षक रिता महतोका अनुसार १५ दिनसम्म सहभागी महिलाहरूलाई विभिन्न प्रकारका आकर्षक गुडिया तथा हस्तनिर्मित खेलौना बनाउने विधि, सामग्री छनोट, डिजाइन, सिलाइ, सजावट तथा बजारमा बिक्रीयोग्य उत्पादन तयार गर्ने व्यावहारिक ज्ञान प्रदान गरिएको थियो। सहभागीहरूले तालिम अवधिभर उत्साहपूर्वक सिक्दै गुणस्तरीय उत्पादन तयार गरेका छन्।
तालिममा २० जना महिलाको सहभागिता रहेको थियो। सहभागी महिलाहरूले तालिमबाट प्राप्त सीपले घरमै बसेर आयआर्जन गर्ने आत्मविश्वास बढाएको बताएका छन्। उनीहरूले आगामी दिनमा सामूहिक रूपमा गुडिया तथा अन्य हस्तकलाका सामग्री उत्पादन गरी स्थानीय तथा बाह्य बजारमा बिक्री वितरण गर्ने योजना रहेको जानकारी दिएका छन्।आयोजक संस्था विकासका अग्रसर पाइलाहरूले महिलाको आर्थिक अवस्था सुदृढ बनाउने, स्वरोजगारका अवसर सिर्जना गर्ने तथा सीपमा आधारित उद्यमशीलता विकास गर्ने उद्देश्यले यस्ता कार्यक्रम निरन्तर सञ्चालन गर्दै आएको जनाएको छ। संस्थाले आगामी दिनमा पनि विभिन्न समुदायका महिलालाई लक्षित गरी सीपमूलक तथा आयमूलक तालिमलाई निरन्तरता दिने प्रतिबद्धता व्यक्त गरेको छ।कार्यक्रमको अन्त्यमा सहभागी महिलाहरूलाई बधाई दिँदै सिकेको सीपलाई व्यवहारमा उतार्न, आत्मनिर्भर बन्न र समाजमा सकारात्मक परिवर्तनको उदाहरण प्रस्तुत गर्न आग्रह गरिएको थियो। सहभागीहरूले स्थानीय सरकार, गैरसरकारी संस्था र समुदायबीचको सहकार्यमा सञ्चालन हुने यस्ता कार्यक्रमले महिलाको आर्थिक सशक्तीकरणसँगै सामाजिक रूपान्तरणमा समेत महत्वपूर्ण भूमिका खेल्ने विश्वास व्यक्त गरेका छन्।
