लहान। सिरहाको लक्ष्मीपुर पतारी गाउँपालिकामा विद्यालय बस दुर्घटना हुँदा एक खलासी धर्मपाल यादव र ५ वर्षीया छात्राको मृत्यु भएको छ।
इलाका प्रहरी कार्यालय महेशपुर पतारीका अनुसार को.१ख.३५९९ नम्बरको पायनर एजुकेसनल एकेडेमी को स्कुल बसको ठक्करबाट बसका खलासी लहान–२२ लवटोल निवासी २२ वर्षीय राम उदगार यादव तथा सोही विद्यालयमा अध्ययनरत लक्ष्मीपुर पतारी–२ निवासी ५ वर्षीया समिक्षा साहको घटनास्थलमै ज्यान गएको हो।
स्थानीय प्रवेश कुमारका अनुसार मंगलबार बेलुका करिब ४:२० बजे विद्यालय बिदापछि विद्यार्थीलाई घर पुर्याउने क्रममा उक्त दुर्घटना भएको थियो।
मृतक बालिकाका गाउँले हजुरबुबा पर्ने नारायण साहका अनुसार बसबाट ओर्लिएपछि समिक्षा अचानक लड्न पुगेकी थिइन्। उनलाई उठाउन खलासी धर्म पाल यादव बसको पछाडितर्फ पुगेका बेला चालकले बस अगाडि बढाउँदा पछाडिको चक्काले दुवैलाई कुल्चिएको बताइएको छ।
प्रहरीका अनुसार दुर्घटना लक्ष्मीपुर पतारीस्थित नथुनी साहको घर अगाडि भएको हो।
दुर्घटनामा संलग्न बसलाई प्रहरीले नियन्त्रणमा लिएको छ। बस चालक फरार रहेकाले उनको खोजी कार्य तीव्र बनाइएको इलाका प्रहरी कार्यालय महेशपुर पतारीले जनाएको छ। घटनाबारे थप अनुसन्धान भइरहेको प्रहरीले जानकारी दिएको छ।
