औरही गाउँपालिका अन्तर्गत पर्ने सुजामावी विद्यालय मा विद्यालय स्वास्थ्य तथा पोषण कार्यक्रम प्रभावकारी रूपमा सञ्चालन भइरहेको छ। बालबालिकाको स्वास्थ्य, पोषण अवस्था तथा सिकाइ क्षमतामा सुधार ल्याउने उद्देश्यले कार्यक्रम सञ्चालन गरिएको हो।विद्यालय स्वास्थ्य तथा पोषण कार्यक्रमको मुख्य उद्देश्य विद्यार्थीहरूको स्वास्थ्य र पोषण अवस्थामा सुधार गर्नु, कुपोषण तथा विभिन्न रोगहरूको रोकथाम गर्नु, साथै विद्यालयमा नियमित उपस्थितिसँगै सिकाइ उपलब्धि बढाउनु रहेको छ। यस कार्यक्रमले बालबालिकामा स्वस्थ जीवनशैली, राम्रो बानी–व्यवहार तथा सरसफाइप्रति सचेतना विकास गर्न समेत महत्वपूर्ण भूमिका खेलिरहेको छ।कार्यक्रमअन्तर्गत विद्यार्थीहरूलाई स्वास्थ्य तथा पोषण शिक्षाबारे विस्तृत जानकारी दिइन्छ। पोषणयुक्त खाना के हो, किन आवश्यक छ भन्ने विषयमा बालबालिकालाई सचेत बनाइन्छ। साथै वर्षमा दुई पटक—एक पटक मंसिर र अर्को पटक जेठ महिनामा—विद्यार्थीहरूलाई जुकाको औषधि वितरण गर्ने गरिएको छ।
त्यसैगरी किशोरीहरूका लागि आइरन चक्की, फोलिक एसिड तथा सूक्ष्म पोषक तत्व वितरण कार्यक्रम पनि सञ्चालनमा रहेको छ। किशोरी अवस्थाका छात्राहरूलाई १३ हप्तासम्म नियमित आइरन चक्की वितरण गरिन्छ, त्यसपछि केही समय रोकिएर पुनः वितरण प्रक्रिया अघि बढाइन्छ। किशोरावस्थामा आइरन किन आवश्यक छ भन्ने विषयमा समेत विशेष जानकारी प्रदान गरिन्छ।
सुरक्षित खानेपानी, व्यक्तिगत सरसफाइ तथा साबुनपानीले हात धुने बानी विकासमा पनि कार्यक्रमले विशेष जोड दिएको छ। यस्ता गतिविधिले विद्यार्थीहरूलाई विभिन्न स्वास्थ्य जोखिमबाट जोगिन आवश्यक ज्ञान र व्यवहार सिकाइरहेको विद्यालयले जनाएको छ।यसका साथै वृद्धि अनुगमन तथा पोषण लेखाजोखा कार्य पनि औरही गाउँपालिकामार्फत विद्यालयमा नियमित रूपमा सञ्चालन हुँदै आएको छ। यसले विद्यार्थीहरूको शारीरिक वृद्धि, पोषण अवस्था तथा स्वास्थ्य अवस्थाको मूल्यांकन गर्न सहयोग पुर्याइरहेको छ।स्थानीय स्तरमा सञ्चालन भइरहेको यस्तो कार्यक्रमले विद्यालयमा अध्ययनरत बालबालिकाको समग्र विकासमा सकारात्मक प्रभाव पार्ने अपेक्षा गरिएको छ।
