मधेश प्रदेशमा कार्यरत सामुदायिक सिकाइ केन्द्रका परिचालिकाहरूलाई लक्षित गर्दै आयोजित ५ दिने ‘आधारभूत मनोसामाजिक सहयोग तथा सामाजिक-भावनात्मक सीप सिकाइ’ तालिम सम्पन्न भएको छ। समुन्नत नेपालको आयोजनामा सम्पन्न उक्त तालिममा धनुषा, महोत्तरी, सिरहा र सप्तरी गरी चार जिल्लाबाट २२ जना परिचालिकाहरूको सहभागिता रहेको थियो।
मंसिर १९ देखि २३ गतेसम्म महोत्तरीको बर्दिवासमा सञ्चालित तालिम समुन्नत नेपालले आयोजना गरेको हो। तालिममा शिक्षा तथा संस्कृति मन्त्रालय, मधेश प्रदेशले समन्वय भूमिका निर्वाह गरेको थियो।
टिपीओ नेपाल तथा समुन्नत नेपालका प्रशिक्षकहरूले सहजीकरण गरेको तालिमको उद्घाटन शिक्षा तथा संस्कृति मन्त्रालय, मधेश प्रदेशका वरिष्ठ शाखा अधिकृत लक्ष्मण रामले गरेका थिए। उद्घाटन सत्रमा बोल्दै उनले वर्तमान समयमा मनोसामाजिक परामर्श अत्यावश्यक बनेको मन्त्रणा दिँदै विद्यालय बाहिर रहेका बालबालिका तथा किशोरकिशोरीलाई वैकल्पिक सिकाइमार्फत सहयोग पुर्याउने परिचालिकाहरूका लागि यस्तो तालिम अत्यन्त उपयोगी हुने बताए। उनले समुन्नत नेपाललाई तालिम आयोजना गरेकोमा धन्यवाद दिँदै यसले सकारात्मक ऊर्जा र परिवर्तन ल्याउन मद्दत गर्ने विश्वास व्यक्त गरे।
पाँच दिनसम्म चलेको तालिममा प्रशिक्षकहरू प्रेमनाथ भट्टराई, रस्मिता श्रेष्ठ (टिपीओ नेपाल) र राम एकवाल महरा (समुन्नत नेपाल)ले सहजीकरण गरेका थिए। तालिममा मनोसामाजिक सहयोगका आधारभूत सिद्धान्त, सामाजिक-भावनात्मक सीप, समुदायमा सुरक्षित वातावरण निर्माणका रणनीति लगायतका विषयमा व्यावहारिक अभ्यास र समूहगत कार्यमार्फत सहभागिहरूले सीप र ज्ञान हासिल गरेका थिए।
युनिसेफको सहयोगमा समुन्नत नेपालले मधेश प्रदेशका १३६ स्थानीय तहमा रहेका २९५ र लुम्बिनी प्रदेशका १०९ स्थानीय तहमा रहेका ३३३ सामुदायिक सिकाइ केन्द्रलाई संस्थागत सुदृढीकरणका लागि निरन्तर कार्य गरिरहेको संस्थाले जनाएको छ। विद्यालय बाहिर रहेका बालबालिका तथा किशोरकिशोरीलाई वैकल्पिक शैक्षिक कार्यक्रम र सचेतना गतिविधिमार्फत शिक्षामा पुनः संलग्न गराउने उद्देश्यमा तीनै तहका सरकारसँग सहकार्य र लागत साझेदारीमा कार्यक्रम सञ्चालन गरेको समुन्नत नेपालका राम एकवाल महराले जानकारी दिए।
उद्घाटन सत्रमा शिक्षा तथा संस्कृति मन्त्रालय, मधेश प्रदेशका शाखा अधिकृत दिलीप मुखिया, समुन्नत नेपालको मेनुका पौडेल र स्वस्तिका बाँनियासहितको उपस्थिति रहेको थियो। तालिममा सहभागी परिचालिकाहरूले आफ्नो कार्यक्षेत्र फर्केपछि प्रत्येकले कम्तीमा १९ वटा सेसन सञ्चालन गर्ने प्रतिबद्धता व्यक्त गरेको समुन्नत नेपालले जनाएको छ। साभार – मधेश पत्रडटकमबाट
